2016, ഫെബ്രുവരി 25, വ്യാഴാഴ്‌ച

ഫോട്ടോഷോപ്പ്

ഓർമ്മകൾ
വറ്റുന്നേടത്ത്
മറവിയുടെ വേനൽ
കത്തിയെരിയുമ്പോൾ
ആൽബമൊരു
ഹെർബേറിയം പോലെ..

പ്രണയകാലങ്ങൾ
ചുണ്ടുചേർത്ത
ചായക്കോപ്പയിലും
തണുത്തുറഞ്ഞു മധുരിച്ചൊഴുകിയിറ്റിയ
ഐസ്ക്രീം കോണിലും
നമ്മുടെ ചിത്രമെഴുത്തുകൾ..

കല്യാണത്തലേന്ന്
ഹൃദയം മിടിച്ചെത്തിയ
ഒരാശംസാഗീതം..
കൊണ്ടെൻറെ മറവിയുടെ ഓർമ്മപ്പെടുത്തലും.
പന്തലിൽ
ഒരിത്തിരിയകലത്തിൽ
നിന്നൊരു സെൽഫിയും,
ഒരാൾക്കൂട്ടച്ചിത്രവും..
പപ്പടം കടിച്ചുചിരിച്ച
നാണത്തോടൊപ്പം
ഒരുവറ്റു പുച്ഛം;
ഒരാഴം മുറിവിനേക്കാൾ,
ഒരുമുഴം മറവിയാലൊരു തിരസ്കാരം..

കുട്ടീടെ നൂലുകെട്ടിന്
ഇത്തിരി പുളിപ്പും ഒരുനുളളുമധുരത്താലും
കുഞ്ഞിച്ചിരിയിൽ
ചുണ്ടുചേർത്തൊരു
മന്ദസ്മിതം..
എന്നിട്ടും
വ്യാഖ്യാനങ്ങൾ ഭയന്ന്
വിസ്മരിച്ചവ..

ചിത്രങ്ങളടുക്കിയും
ഒടുക്കിയും
ഒട്ടിച്ചുചേർത്തിട്ടും
പരിചയം ഭാവിക്കാതെ
തിരസ്കരിച്ചൊടുക്കം
നിൻറെ
ചരിത്രത്തിലിടമില്ലാതായിപ്പോയവൾ 😃

2016, ഫെബ്രുവരി 24, ബുധനാഴ്‌ച

മലകയറ്റം

പടവുകൾ വളഞ്ഞു
തിരിഞ്ഞ്
കുതിച്ച്
കിതച്ചെത്തുന്ന
മലകയറ്റം..
അഹന്തയറ്റ്
നമ്മളൊന്നായ് ലയിച്ച്
നെടുവീർപ്പാലൊന്ന്
ആശ്വാസം
തോൾചേർക്കേ,
നമുക്കൊരു
പ്രണയത്തിൻറെ ദൂരക്കാഴ്ച..
അകലങ്ങളിലെവിടെയോ
അലിഞ്ഞലിഞ്ഞില്ലാതാകുന്ന
മഞ്ഞും
കണ്ണുകുത്തുന്നൊരു
സായന്തനച്ചുവപ്പും
നാമൊന്നുമല്ലെന്ന്
ഒരന്തസ്സാര ശൂന്യത.. 😃😍